Oerd bylykbashi biography
Oerd Bylykbashi
Oerd Bylykbashi | |
|---|---|
| Në detyrë 2013–Vazhdon | |
| U lind më | 23 maj 1974 Durrës |
| Nënshtetësia | Shqiptar |
| Partia politike | PD |
| Fëmijët | 2 vajza |
| Arsimimi | Fakulteti Juridik, UT |
| Punësimi | Politikan, jurist |
Oerd Bylykbashi është politikan shqiptar, deputet i Partisë Demokratike në Kuvendin e Shqipërisë.[1][2]
Oerd Bylykbashi lindi në Durrës më 23 maj 1974 në një familje arsimtarësh.
U diplomua si jurist në Fakultetin e Drejtësisë të Universitetit të Tiranës në vitin 1996. Në vitet 2011-2012 kreu studimet për Master në shkencat juridike publike në të njëjtin fakultet.
Nga viti 2001 ne vitin 2003 punoi si ekspert i ligjit zgjedhor dhe nga viti 2003 deri në 2007 ishte drejtues i Zyrës së Reformës Zgjedhore në Prezencën e Organizatës për Siguri dhe Bashkëpunim në Evropë (OSBE) në Shqipëri.
Në vitin 2007 shërbeu si ekspert i OSBE/ODIHR me misionin ndërkombëtar të vëzhgimit të zgjedhjeve parlamentare në Belgjikë.
Gjatë vitit 2007 shërbeu si këshilltar ligjor i Kryeministrit të Shqipërisë. Duke filluar nga dhjetori i atij viti, deri në vitin 2009 Oerd Bylykbashi ushtroi detyrën e Drejtorit të Departamentit të Kontrollit të Brendshëm dhe Anti-korrupsionit pranë Kryeministrit.
Nga viti 2009 deri në vitin 2013 ishte drejtor kabineti i Kryeministrit dhe përfaqësues i Partisë Demokratike në Komisionin Qendror të Zgjedhjeve.
Përgjatë periudhës 2007-2013 përfaqësoi Partinë Demokratike në negociatat politike për reformën kushtetuese, reformën zgjedhore, nismën për kufizimin e imunitetit parlamentar, si dhe marrëveshjen për zhbllokimin miratimit të ligjeve me shumicë të cilësuar në kuadër te integrimit evropian.
Në vitin 2013 Oerd Bylykbashi u zgjodh deputet i Partisë Demokratike në Kuvendin e Shqipërisë. Në periudhën 2016-2017 drejtoi për një vit degën e PD-së Durrës.
Oerd Bylykbashi është hartuesi i ligjit për dekriminalizimin e politikës dhe administratës në Shqipëri. Ky ligj u kërkua nga Partia Demokratike në opozitë për të pastruar parlamentin dhe administratën shtetërore nga personat me të kaluar kriminale ose me precedentë penalë. Qindra zyrtarë me dënime penale janë larguar nga funksionet shtetërore apo nuk janë lejuar të zgjidhen si pasojë e këtij ligji, mes tyre ish-deputetë, ish-kryetarë bashkish apo ish-drejtues të lartë të administratës.
Bylykbashi ishte përfaqësues i Partisë Demokratike në opozitë në bisedimet me përfaqësuesit e Partive në pushtet për realizimin e reformës kushtetuese në drejtësi në vitin 2016 dhe në Këshillin Politik në vitin 2020 për arritjen e marrëveshjes së 5 qershorit 2020 për reformën e Kodit Zgjedhor që u aprovua më 23 korrik 2020.
Bylykbashi është njëri nga bashkëhartuesit e statutit të PD-së të 11 dhjetorit 2021, i cili synon demokratizimin e PD duke reduktuar pushtetin e organeve monokratike në favor të vendimmarrjes kolegjiale dhe ndarjes së pushteteve brenda partisë.
Në qershor 2022, Oerd Bylykbashi u zgjodh nënkryetar i Partisë Demokratike.
Shiko edhe
[Redakto | Redakto nëpërmjet kodit]Grupi Parlamentar i Partisë Demokratike të Shqipërisë 2013-2017
Lista e deputetëve të Legjislaturës VIII të Kuvendit të Shqipërisë
Shënime
[Redakto | Redakto nëpërmjet kodit]- ^"KQZ Rezultatet Përfundimtare të Zgjedhjeve për Kuvendin e Shqipërisë 2013"(PDF). Arkivuar nga origjinali(PDF) më 12 korrik 2017. Marrë më 25 korrik 2015.
- ^Kuvendi i Shqipërisë - Jetëshkrimet e deputetëve